გადახდები, თანხის დაბრუნება და დავები

1. ზოგადი დებულებები

წინამდებარე „გადახდების, თანხის დაბრუნებისა და დავების პოლიტიკა“ განსაზღვრავს PAY4FUN-ის პლატფორმაზე განხორციელებული გადახდების, გამყიდველისთვის თანხის გადარიცხვის, მყიდველისთვის თანხის დაბრუნებისა და შეკვეთასთან დაკავშირებული დავების განხილვის ძირითად პირობებს.

პოლიტიკა წარმოადგენს PAY4FUN-ის „წესებისა და პირობების“ განუყოფელ ნაწილს.

2. გადახდის განხორციელება

PAY4FUN-ის პლატფორმაზე შეკვეთის საფასურის გადახდა ხორციელდება პლატფორმაზე ხელმისაწვდომი გადახდის მეთოდების გამოყენებით, პარტნიორი საგადახდო მომსახურების პროვაიდერის მეშვეობით.

გადახდის წარმატებით განხორციელების შემდეგ ტრანზაქციის თანხა დროებით ინახება საგადახდო მომსახურების პროვაიდერთან და გამყიდველისთვის თანხის გადარიცხვა ხორციელდება წინამდებარე პოლიტიკისა და PAY4FUN-ის სხვა მოქმედი წესების შესაბამისად.

PAY4FUN არ ინახავს, არ ფლობს და არ განკარგავს მომხმარებლების ფულად სახსრებს.

3. გამყიდველისთვის თანხის გადარიცხვა

გამყიდველისთვის თანხის გადარიცხვა ხორციელდება ტრანზაქციის წარმატებით დასრულების შემდეგ.

ტრანზაქცია წარმატებით დასრულებულად ითვლება, როდესაც გამყიდველი ასრულებს შეკვეთას და მყიდველი PAY4FUN-ის პლატფორმაზე ადასტურებს პროდუქტის ან მომსახურების მიღებას, ან შეკვეთა წინამდებარე პოლიტიკის შესაბამისად ავტომატურად ითვლება დასრულებულად.

გამყიდველისთვის გადასარიცხი თანხიდან შეიძლება დაიქვითოს PAY4FUN-ის მოქმედი საკომისიო „გამყიდველთან თანამშრომლობის პირობების“ შესაბამისად.

4. თანხის დაბრუნება

მყიდველისთვის გადახდილი თანხის სრულად დაბრუნება ხორციელდება შემდეგ შემთხვევებში:

• გამყიდველის მიერ შეკვეთის გაუქმება — გამყიდველს შეუძლია გააუქმოს შეკვეთა პროდუქტის გადაცემის ან მომსახურების შესრულების დაწყებამდე. ასეთ შემთხვევაში მყიდველის მიერ გადახდილი თანხა სრულად უბრუნდება მყიდველს;

• დავის მყიდველის სასარგებლოდ გადაწყვეტა — თუ PAY4FUN დავის განხილვის შედეგად მიიღებს გადაწყვეტილებას მყიდველის სასარგებლოდ, გადახდილი თანხა სრულად უბრუნდება მყიდველს.

თუ დავა გადაწყდება გამყიდველის სასარგებლოდ, თანხის დაბრუნება არ განხორციელდება და ტრანზაქციის თანხა გადაირიცხება გამყიდველისთვის პლატფორმის მოქმედი წესების შესაბამისად.

PAY4FUN-ის პლატფორმაზე ნაწილობრივი თანხის დაბრუნება არ ხორციელდება.

5. თანხის დაბრუნების წესი

თანხის დაბრუნება ხორციელდება იმავე გადახდის საშუალებაზე, რომლითაც მყიდველმა განახორციელა შესაბამისი გადახდა.

თანხის დაბრუნება მუშავდება პარტნიორი საგადახდო მომსახურების პროვაიდერის მეშვეობით. თანხის მომხმარებლის ანგარიშზე ასახვის ვადა შესაძლოა დამოკიდებული იყოს საგადახდო მომსახურების პროვაიდერზე, ბანკზე ან გამოყენებულ გადახდის მეთოდზე.

PAY4FUN არ არის პასუხისმგებელი თანხის დაბრუნების დამუშავების შემდეგ ბანკის, საგადახდო მომსახურების პროვაიდერის ან სხვა შესაბამისი ფინანსური დაწესებულების მიერ გამოწვეულ შეფერხებაზე.

6. დავის წამოწყება

გამყიდველის მიერ შეკვეთის შესრულების დადასტურების შემდეგ მყიდველს შეუძლია:

• დაადასტუროს პროდუქტის ან მომსახურების მიღება; ან
• გაასაჩივროს შეკვეთა, თუ პროდუქტი ან მომსახურება სრულად არ მიუღია ან მიღებული პროდუქტი ან მომსახურება არ შეესაბამება მყიდველსა და გამყიდველს შორის შეთანხმებულ პირობებს.

დავის წამოწყების შემთხვევაში შეკვეთა გადადის განხილვის პროცესში და მასზე გადაწყვეტილებას იღებს PAY4FUN წინამდებარე პოლიტიკის შესაბამისად.

7. გასაჩივრების ვადა და მყიდველის უმოქმედობა

მყიდველს შეუძლია გაასაჩივროს შეკვეთა გამყიდველის მიერ შეკვეთის შესრულების დადასტურებიდან 48 საათის განმავლობაში.

თუ აღნიშნულ ვადაში მყიდველი არც დაადასტურებს პროდუქტის ან მომსახურების მიღებას და არც გაასაჩივრებს შეკვეთას, შეკვეთა ავტომატურად ჩაითვლება დასრულებულად.

48-საათიანი ვადის გასვლის შემდეგ შესაბამის შეკვეთაზე დავის წამოწყება PAY4FUN-ის პლატფორმის მეშვეობით აღარ იქნება შესაძლებელი.

8. დავის განხილვა და მტკიცებულებები

დავის განხილვისას PAY4FUN აფასებს მყიდველისა და გამყიდველის მიერ წარმოდგენილ ინფორმაციასა და მტკიცებულებებს.

PAY4FUN-მა შეიძლება გაითვალისწინოს, მათ შორის:

• PAY4FUN-ის პლატფორმაზე მხარეებს შორის მიმოწერა;
• შეკვეთასთან და მის შესრულებასთან დაკავშირებული ინფორმაცია;
• ეკრანის სურათები, ფოტოები ან სხვა ელექტრონული მასალა;
• პროდუქტის გადაცემის ან მომსახურების შესრულების დამადასტურებელი ინფორმაცია;
• მხარეების მიერ წარმოდგენილი სხვა ინფორმაცია, რომელიც დაკავშირებულია კონკრეტულ დავასთან.

PAY4FUN უფლებამოსილია მხარეებს მოსთხოვოს დავის გადაწყვეტისთვის საჭირო დამატებითი ინფორმაცია ან მტკიცებულება და განსაზღვროს მათი წარდგენის გონივრული ვადა.

თუ მხარე მოთხოვნილ ინფორმაციას ან მტკიცებულებას განსაზღვრულ ვადაში არ წარადგენს, PAY4FUN უფლებამოსილია დავა განიხილოს მის ხელთ არსებული ინფორმაციის საფუძველზე.

9. დავაზე გადაწყვეტილება

PAY4FUN თითოეულ დავას განიხილავს ინდივიდუალურად, წარმოდგენილი ინფორმაციის, მტკიცებულებების, შეკვეთის გარემოებებისა და პლატფორმის მოქმედი წესების გათვალისწინებით.

დავის განხილვის შედეგად PAY4FUN იღებს გადაწყვეტილებას მყიდველის ან გამყიდველის სასარგებლოდ.

მყიდველის სასარგებლოდ გადაწყვეტილების შემთხვევაში თანხა სრულად უბრუნდება მყიდველს, ხოლო გამყიდველის სასარგებლოდ გადაწყვეტილების შემთხვევაში თანხა გადაირიცხება გამყიდველისთვის წინამდებარე პოლიტიკის შესაბამისად.

10. დავის პროცესის ბოროტად გამოყენება

დავის პროცესის გამოყენება თაღლითური მიზნით, ყალბი ინფორმაციის ან მტკიცებულებების წარდგენა, მტკიცებულებების გაყალბება ან დავის პროცესით სხვაგვარი ბოროტად სარგებლობა აკრძალულია.

ასეთ შემთხვევაში PAY4FUN უფლებამოსილია მიიღოს პლატფორმის მოქმედი წესებით გათვალისწინებული შესაბამისი ზომები მომხმარებლის მიმართ.

11. ხელშეკრულებაზე უარის თქმის უფლება

გადახდის განხორციელებით მყიდველი ადასტურებს, რომ სურს შეკვეთის შესრულება დაიწყოს დაუყოვნებლივ და აცნობიერებს, რომ მოქმედი კანონმდებლობით გათვალისწინებულ შემთხვევებში კარგავს ხელშეკრულებაზე უარის თქმის უფლებას.

აღნიშნული არ ზღუდავს მყიდველის უფლებას მიიღოს თანხის დაბრუნება წინამდებარე პოლიტიკით გათვალისწინებულ შემთხვევებში.